轉載 - 殺人鯨

轉載來源
http://zh-yue.wikipedia.org/wiki/%E6%AE%BA%E4%BA%BA%E9%AF%A8

殺人鯨（英文 Orca / Killer Whale），學名叫虎鯨 / 逆戟鯨（Orcinus orca），有啲人都誤會咗佢係鯨魚嘅一種，事實上佢係世界上最大，最孔武有力嘅海豚品種。因為獵食時兇殘，曾有咬人嘅記錄，而且重食好多海豹同海豚而得到殺人鯨呢個名。
其實，到而家殺人鯨都冇殺人嘅記錄，唯一一次攻擊記錄係咬住一個滑浪者，但好快就放咗佢。
分布 :
黑白兩間係殺人鯨嘅特色。背鰭非常高聳，可達 1.8 公尺，每條殺人鯨嘅背鰭都唔同，亦係科學家主要分辨佢哋嘅特徵。對眼後面有好明顯嘅橢圓形白斑。下巴同胸前肚腩都呈白色，胸鰭大，圓圓哋。殺人鯨個腦好大，有人腦 4 倍咁重。
廣泛分布世界各大海大洋，由兩極冰嘅邊緣到赤道邊嘅近岸同海都有發現。喺台灣，喺台東台南一帶水域有人見到殺人鯨嘅蹤跡。但係喺香港水域，到而家都冇殺人鯨出沒嘅記錄。
食物及生態地位 :
殺人鯨主要係食魚。餓起上嚟有時會食海豹、海獅、海豚、連大白鯊、北極熊都食得落肚。殺人鯨除咗人，乜嘢都唔驚，係海洋生態裏面嘅頂級捕獵者，有助維持海洋生態平衡，殺人鯨嘅健康同數量亦係海洋健康情況嘅一個指標。
科學家最了解嘅群落就只有北美太平洋岸嘅居留群，已經研究咗呢群裏面某啲鯨群有足足30年。
保育現狀:
香港海洋公園響以前分別養過兩條殺人鯨：海威小姐同皇子，海威小姐響 1979年1月29日由冰島來港，到 1997年4月21日病死；皇子響 1989年4月13日由日本來港，直到 1991年7月10日病死。海洋公園現計劃再物色另一條殺人鯨嚟香港定居。